AC leh 4-wheel awm kawp Bolero Camper tlangzarh

Mana Motors chuan nimin khan showroom, Bawngkawnah Mahindra Bolero Camper thar an khuh hawng. An duhthusam anga siam chhuah a nih thu an sawi a, pahnih an hralh chhuak nghal a, hauh lawk 30 an awm bawk.

Mana Motors dealer principal Dr Marina chuan "Camper hi Mizorama hriat lar, bungraw phur leh mihring phur thei a ni a. Company dangin nei ve tho mah se Mahindra Camper man a tlawm bik hle," tiin chhungkaw lirthei atana hman theih leh thil phur hlawk tak a nih thu a sawi.

Camper tharah hian a hmaa mi an duhkhawp lo lai thuam ṭhain changkang zawkin an duang a; air conditioner (AC) leh four-wheel drive a awm kawp tawh. AC four-wheel drive-ah engine M2DiCR, 4 cylinder, 2523 cm hmangin 59.7 kw leh 220 Nm torque a pe chhuak thei. Fuel litre 57 lengin a hmaah mi pali aia tam a chuan theih. Mizoram dealer atangin Rs 10,51,815; Rs 10,67,445; Rs 10,91,318; Rs 10,98,731 leh Rs 11,04,026-in a lei chhuah theih.

Mana Motors hian thla liam ta December 2025 khan lirthei 217 hralhin thla khat chhunga an hralh chhuah tam ber a ni. Mi mal hman chi (passenger car) 118 hralhin thla khata an hralh hnem ber a ni a, sumdawnna atana hman chi erawh 99 telin an hralh chhuah dan tlanglawn a ni ve thung.