68th Grammy Awards-ah Kendrick Lamar che ṭha ber

Rimawi huanga chawimawina ngaihhlut, Grammy Awards vawi 68-na chu Pathianni zan khan Crypto.com Arena, Los Angeles-ah host Travor Noah kaihhruaina hnuaiah hlawhtling taka neih a ni. Kumin Grammy-ah hian Kendrick Lamar che ṭha berin nomination pakua a hmuh aṭangin award panga a hum haw a, record thar a siam nghal.

Lamar award lak zingah hian 'Best Rap Album', 'Best Rap Song', 'Melodic Rap Performance' te an tel. Lamar hian Grammy 26 dawng tling tawhin Jay-Z record awmsa 25, rapper zinga Grammy awards dawng hnem ber nihna a khum ta a ni. SZA nena an thawh dunna 'Luther' chuan 'Record of The Year' a dawng bawk.

Bad Bunny pawhin record thar siamin, Spanish ṭawng hmanga hla tihchhuah zinga a hmasa ber ni turin 'Album of The Year' chu 'Debí Tirar Más Fotos' hmangin a dawng a; JB, Sabrina Carpenter, Tyler, the Creator, leh Kendrick Lamar-te a khum vek thei.

Billie Eilish chuan a hla 'Wildflower' hmangin 'Song of The Year' a hum haw a; Olivia Dean pawhin 'Best New Artist' lawmman a dawng ve bawk. Lady Gaga chuan award pahnih 'Best Pop Vocal Album' leh 'Best Dance Pop Recording' chu a hla 'Abracadabra' hmanga a dawn ve ve bakah, he hla hmang vek hian producer-remixer Gesaffelstein chuan awards a dawn phah bawk. Kuminah hian category 95 aṭangin award hi sem a ni.