Hlawh phu lova pek hnem ber Johnny Depp

Hollywood star-te hi an hlawh a sang hlawm hle a, A-list-te phei chu an hlawh hnem lehzual. Hetianga hlawh sang tak tak an pek, anmahni phu loha an pek zingah Johnny Depp chu a sang ber. Hlawh phu loa hlawh an pek zingah Johnny Depp hian hma a hruai.

Amber Heard nena an inṭhenna buaipui zel a la ni a, a hmingchhe hle. Nupui kutthlak chingah Heard hian a puh bawk. Hengte avang hian Johnny Depp hi a hmingchhe hle a, Hollywood-a hlawh phu lo hlawh tarlan zingah pawh a hmingchhe ber a ni leh mek a nih hi. A kum zawnin Pirates of the Caribbean changtupa hi mahni phu tawk aia tam hlawh zinga phu lo bera Forbes-in a thlan ṭum hnihna a ni ta a, nikum pawh khan pakhatna a ni tawh. Forbes-in a chhut dan chuan, Johnny Depp film chan pakhatin USD 2.80 zel box office aṭanga a lakluhah Johnny Depp hian USD 1 zel a lo hlawh ang a ni. Hemi awm≠zia chu Johnny Depp-a hi a hlawh hnem ngaihtuahin a channaten sum an hmu chhuak ṭha tawk lo tihna a ni.

Johnny Depp tichhetu chu nikuma a film chan pahnih - Transcendence leh Mortdecai te kha a ni. Heng film pahnihte hi a flop hle a, sum an hmuchhuak tlem. Forbes-in an chanchin a tarlan hi nikum July aṭanga kumin June thla chhung a ni.

Will Smith hi actor hlawhtling angin lang mahse Forbes-in Most Over Paid Actor a thlan chhuahah hian pahnihnaah a lang thei. Johnny Depp ai chuan a hlawh ngaihtuah a channaten sum a hmu ṭha zawk deuh. A channa film pakhatin box office aṭangin USD 5 hmu ta se, chung aṭang chuan USD 1 zel a lo hlawh ang a ni.

Channing Tatum chu pathumna a ni a, a channa film-in USD 6 a hmuh chhuahah USD 1 zel a lo hlawh ve a, Will Ferrel chu palinaah langin a channa film-in USD 6.50 a lakluhin USD 1 zel a lo hlawh bawk. George Clooney chu panganaah a lang pha a, a channa film pakhatin USD 6.70 a lakluhin a hlawhah USD 1 zel an pe. Top 10-ah hian Adam Sandler, Mark Wahlberg, Leonardo DiCaprio, Julia Roberts leh Bradley Cooper te an ni.