Seltos thar leh Carens Clavis EV tlangzarh

LBS Motors LLP chuan nimin khan Baptist Centre, Falkland-ah a rualin Kia car pahnih, Seltos thar leh Carens Clavis Electric Vehicle an tlangzarh. Transport Department director Er Lalrammawia'n Carens Clavis EV a khuh hawng a, Home Department joint secretary PC Lalduhthlana'n Seltos thar a khung hawng bawk.

Kia hian India ramah August 22, 2019 khan Seltos tlangzarhin car an siam chhuah zinga an hralh theih ber a ni a, January 2026 thlengin India ramah 6,00,000 vel an hralh. January 2, 2026 khan a thar tichhuakin Mizoramah thla khat chuang hnuah khuh hawn a ni a, a man tlawm ber Rs 14,95,094 leh a to ber Rs 23,05,157-in a lei chhuah theih.

July 15, 2025-ah India ramah Carens Clavis EV tlangzarh a ni a, LBS Motors-in Mizorama Kia electric car an tlangzarh hmasak ber a ni. Mi pasarih ṭhut theihna niin chhungkaw tan pawha hman theih, chak taka tlanpui ngam tura siam a ni. Mizoramah Carens Clavis EV hi a man tlawm ber Rs 20,14,749 niin a to ber Rs 27,05,294 a ni ve thung

Battery chi hnih a awm a, a tê zawk 42kwh niin 99kw leh 255Nm a pe chhuak thei a, charge full-in km 404 tlan thei. Battery lian zawk 52kwh niin 126kw leh 255Nm a pe chhuak thei a, charge full-in km 490 a tlan thei.