Indian celebrity-te CAB duh loin an au chhuak

Citizenship (Amendment) Bill chu Nilaini zan khan Rajya Sabha-ah pawm a ni a; hetihlai hian Bollywood star zingah pawh duh lotu an tam hle.

Lok Sabha-a pass a nih hnu lawk khan celebrity ṭhenkhat chuan twitter-ah CAB an duh loh thu an tarlang a, chung zingah chuan Richa Chadha, Twinkle Khanna, Swara Bhaskar leh Anubhav Sinha-te pawh an tel. National Film Award pawh pahnih lai dawng tawhtu, Pooja Bhatt chu CAB a duh loh thu van­tlang hmaa puangchhuak hmasa deuh ber niin, Thawhṭanni tlaiah khan a twitter-ah American mifing leh sociologist lar, DaShanne Stokes thusawi hmangin CAB a duh loh thu a tarlang.

Actress ṭhin lehkhabu ziah lama tun hnaia lar em em, Akshay Kumar nupui Twinkle Khanna pawhin, "Hnam, vun rawng, sakhuana, chi leh kuang leh thildang engpawh hmanga inthliarhranna hian mihring nihphunga dikna awm sa chu a bawhchhia a ni," a ti. Lok Sabha-a vote lak laia vote tlak dan NDTV-in twitter-a an tarlan chu retweet-in Richa Chaddha chuan 'GOD SAVE US' tiin a ziak bawk.

Film director Anubhav Sinha pawhin Indian Muslim-te dawhtheihna chu fakin hei hian a la kiansan ang che u tiin a hnem. Actor Siddharth chuan Tamil Nadu chief minister Edapadi Palanisamy-a'n CAB a thlawp chu a dem thu sawiin, CAB a thlawpna chuan a nihna dik tak a tilang tih a sawi.

Assam artist-te pawhin an dodal thu sawi bawkin Guwahati-ahte kawng an zawh tawh bawk. Hmar­chhak ṭhalai tam tak chuan social media lamah CAB an duh lohthu aupuiin, an state MP CAB  thlawptute pawh an dem hle a ni.

CAB hi Pakistan, Afghanistan leh Bangladesh aṭanga sakhuana vanga tihduhdah tuar, Muslim ni lo Hindu, Sikh, Buddhist, Jains, Parsis leh Kristian, December 31, 2014 hma lama India rama awm tawhte khua leh tui pek theihna dan a ni.