Olympic meichher kengtu zingah Enhypen 'Sunghoon'

South Korean boy band, Enhypen member leh figure skater hlui, Sunghoon chu Italy-a 2026 Milan Cortina Winter Olympics-a Olympic meichher kengtu zingah a tel. Ningani khan Milan-a Bolivar Station bulah Sunghoon hian meichher hi kengin, a fan-te pawh an pungkhawm tam hle. Sunghoon hian mi dang kuta meichher a hlan hma hian minute 20 vel mipui leh fan-te nen kawng an zawh a ni. 2026 Milan Cortina Winter Olympics hi February 6 - 22 chhung neih a ni ang.

Sunghoon hi Enhypen member-a a tel hmain South Korea national figure skating reserve team-ah a tel ṭhin a, figure skater hriat hlawh tak niin kum 2014 khan Korea Figure Skating Championships junior division-ah telin, ISU Junior Grand Prix-ah pawh a lo tel tawh bawk. Kum 2019-a skating a chawlhsan hnuah, Mnet audition program 'I-Land' kaltlangin Enhypen member atan lak a ni.

Sunghoon hi K-pop star zinga Olympic meichher keng thei pahnihna a ni a, kum 2024 khan BTS member Jin chu Paris Summer Olympic-ah meichher kengtu a lo ni tawh bawk.