Lehkhabu bawm : 'Zofate Genesis (BC 2200 - AD 17779)' tlangzarh

Revd Lianzira ziah, Mizo ṭobul chhuina 'Zofate Genesis (BC 2200 - AD 17779)' tih chu Zirtawpni khan I&PR Auditorium-ah T.J. Lalnuntluanga, minister hluiin a tlangzarh.

He lehkhabu hi Revd Lianzira hian Asia ram hrang hrang leh Burma ram chhunga a awm laia a ziah a ni a, kum 10 liam ta daiha a ziah tawh niin, Mizo ṭobul chu BC 2200 atanga chhui ṭanin AD 1779 thleng a chhui a ni.

Tlangzarh inkhawm hi Dr. H. Laldinmawia, HoD, Department of Mizo, Pachhunga University chuan a kaihruai a. Dr. Malsawmdawngliana, Asst. Professor, Department of History, Govt. Aizawl West College chuan lehkhabu hi a thlirlawk thung. "Zofate Genesis tih lehkhabu hi Revd Lianzira hian lehkhabu chi hrang hrang 200 chuang leh mi 40 chuang a kawmna aṭang a ziak a ni a, chuvang chuan Mizo ṭobul chungchanga innghahna tlak leh rintlak lehkhabu niin ka hria," a ti.

Lehkhabu tlangzarhtu Pu TJ Lalnuntluanga pawhin Revd Lianzira lehkhabu chu research scholar leh history la ziak turte tan pawh lehkhabu rawn tlak leh tling a nih ngei a rin thu a sawi.