'Shark Tank' sawmna hnawltu Mizoram chhuak "Local All Natural Soda"

Khawvel huapa reality show ngaihven hlawh leh thawm lian, 'Shark Tank India' ah Mizoram kut chhuak 'Local All Natural Soda' chu a neitu Zomawii Khiangte leh a pasal Phillipe Rodrigue-ten pitch-na hun an nei a, an product hian Shark Tank panel-te hlut pawh a hlawh hle.

Zomawii Khiangte chuan show-ah hian an product chu an lo hriatsa avanga tel tura sawm an nih thu Vanglaini a hrilh. Shark member zinga ṭhu, India-a skincare lar Minimalist co-founder leh CEO ni bawk Mohit Yadav chuan company-a share 25% chan a, Rs vbc 23 invest a offer a; mahse, hmalam hun an thlir avangin offer hi an hnawl tih a sawi.

Local All Natural Soda hi Zomawii Khiangte leh a pasal Phillipe Rodrigue-ten kum 2021, December thlaa an din niin, Rodrigue hian brewing lamah sulhnu a lo neih tawh chu chhawr ṭangkaiin in tur tui tak an siam chhuak a ni. Product chi hrang hrang neiin Serthlum, Serṭawk, Sawhthing, leh Dragon Fruit-te hmangin in tur hi an siam chhuak a, tualchhung aiin state pawn lamah an hralh chhuak tam zawk.

Mizoram chhunga loneitute thil thar, market lian zawka zawrh chhuah chu an thil tum ber zinga mi a nih thu Zomawii chuan a sawi. Hmanrua an hmante hi tualchhung aṭanga thar chhuah vek a ni a, tualchhunga loneitute thil thar leisak a hman ṭangkai chu an tum pawimawh tak a ni. An ṭhang duang hle a, North East huam chhunga music festival lian thama beverage partner an ni chho deuh char char thei a ni.

An thil siam chhuah zingah Serthlum leh Sawhthing aṭanga siam chu hralh hlawk ber pawl a ni a, Mizoram sorkarin flagship programme a neih sawhthing thar chhuah nen pawh a inhne rem hle niin Zomawii chuan Vanglaini a hrilh. Mizoram chhunga siam vek niin thawktu mi 20 bawr velin hneh takin an vil reng a ni. Kum 2024-a pre-seed fundraising round an neihah khan USD mtd 1.25 hmu chhuakin, Mizoram start-up zinga hetiang dinhmun thleng thei hmasa ber an ni bawk.

Company hian ram chhunga metro city hrang hrangah manufacturing kalpui chu an hmachhawp niin, metro city bakah khawpui dang dangah pawh huang zauh zel chu an tum bawk tih Vanglaini a hrilh.