Casey Wasserman-a'n a agency hralh tum

American entertain-ment executive leh sports agent, Casey Wasserman chuan a Talent Agency enkawl lai chu tun hnaia Epstein file-a Ghislaine Maxwell email a thawnna pholan a nih hnua sawiselna tam tak a dawn avangin hralh a tum tih Zirtawpni liamta khan a puang.

Wasserman chuan a hralhna tur leh a hun erawh a tarlang lo a, company president Mike Watts-a'n agency hralh tur chu a buaipui dawn tih a sawi. A hun kal tawha a thil lo tihsualin mi tam tak a nghawng chu pawi a tih thu tarlangin, an client-te leh an thawhpui dangten sawisel an hlawh tel chu pawi a tih takzet thu a sawi bawk.

Sawiselna a tawh bakah, a agency hnuaia artist hrang hrang; Chappell Roan, Orville Peck, Wednesday, Best Coast leh John Summit-ten company an chhuahsan tih an puan hnuah thutlukna hi siam a ni. Infiamna lamah hall of fame soccer player Abby Wambach pawhin company chhuahsan a tum thu a puang tawh bawk a ni.