Paramount-in ByteDance hnenah cease-and-desist letter thawn

Media company Paramount Skydance chuan Chinese internet technology company, ByteDance chu Seedance video leh Seedream image generative AI platform hmangin dan loin an production ṭhenkhat an siam danglam niin an puh. Chung zingah chuan 'South Park,' 'Star Trek,' 'The Godfather,' 'Dora the Explorer' leh a dangte pawh a tel.

Hemi chungchangah hian Inrinni liam ta khan Paramount Skydance head of intellectual, Gabriel Miller chuan ByteDance CEO Liang Rubo hnenah cease-and-desist letter a thawn a ni. Disney pawhin Zirtawpni liam ta khan Star Wars, Marvel leh Disney franchise danga character-te AI platform hmanga phalna nei loa an siam danglam avangin cease-and desist letter hi an lo thawn tawh bawk.

Seedance hi tunhnaia AI video system Hollywood-a hman lar thar a ni. ByteDance Seedance 2.0 kar liam taa a viral hnuah Tom Cruise leh Brad Pitt-te rooftop-a an insual lai siam a ni. Motion Pictures Association chuan he video vang hian Ningani khan ByteDance lakah an lungawi loh thu an thlen. Actor union SAG-AFTRA leh Human Artistry Campaign pawhin ByteDance AI model an dem thu an tarlang.