Gaming News Kumin chhunga game langsar tura rin

The Hollywood Reporter chuan Thawhlehni khan kumin chhunga game tlangzarh tur, ngaihven chi nia an ngaih ṭhenkhat an tarlang a, gamer-te tan chuan ngaihven chi tak tak an nih hmel. God of War: Ragnarok, Halo Infinite, Gotham Knights, Horizon Forbidden West leh Far Cry 6-te pawh chung zingah chuan a tel.

God of War sequel thar God of War: Ragnarok hi gamer tan chuan ngaihven loh chi pawh a ni lo. Kum 2018-a an tlangzarh God of War chhunzawmna niin a game hmasa tawpah khan teaser tawite an dah zeuh a, chu chuan gamer tam tak a tiphur. Norse mythology behchhana game siam, hmasang Norway hunlaia thil thleng anga an siam protagonists Kratos leh a fapa Atreus-te chungchang game hi Playstation 5-ah tlangzarh a ni phawt dawn a, gaming console dangah an tlangzarh dawn em tih chiang taka sawi a la awm lo. Kumin chhunga tlangzarh tur ni mah se tlangzarh hun tur tak erawh an la puang lo a, God of War series pakuana a ni tawh dawn a ni.

First-person shooter game Far Cry 6 hi Caribbean ram Yara-a thil thleng anga set a ni dawn a, Far Cry game zawng zawng chu a la hit vek a tih theih a, Far Cry 6 pawh hi a hit leh ngei ang tih a rinawm.

Amazon Luna, Microsoft Windows, PlayStation 4, PlayStation 5, Xbox One, Xbox Series X/S, leh Stadia-ahte a khelh theih dawn a, February thla tawp lamah hi chuan game developer Ubisoft Toronto chuan tlangzarh hman ngei an tum tih an lo sawi tawh a ni.

Kum 2017-a best-selling action role-playing game Horizon Zero Dawn chhunzawmna Horizon Forbidden West hi sawi hmaih chi a ni lo. Kumin kum chawhnu lamah PlayStation 5-ah tlangzarh an tum a, YouTube lama trailer an dah chhuah en ringawt pawhin khelh chakawm tak a ni.

Kumtirah khan campaign gameplay tlangzarh a lo ni tawh a, Halo game lo tuipui tawhte tan chuan khelh a chakawm tawh hle ang. First-person shooter game Halo hi Mizo gamer-teah a mikhual lo a, Halo series main entry game parukna tur ni tawhin kum 2015-a an tlangzarh Halo 5: Guardians chhunzawmna tur a nih hmel a, nikum lama tlangzarh an tum tawh kha ni mah zawkin an la tlangzarh hleithei lo a; kumin kum tawp lamah erawh tlangzarh ngei an tum ruh hle. Windows, Xbox One, leh Xbox Series X/S-ahte a khelh theih dawn a ni.

Warner Bros. Games Montreal action role-playing game Gotham Knights hi August-a DC fandome-ah khan khuh hawn a ni a, Batman sidekick- Batgirl, Nightwing, Red Hood leh Robin-te a hman theih dawn. Batman thih hnua Gotham khawpuia thil thleng anga set a ni a, solo leh two-player online angin a khelh theih ang.