Discord-in age verification kalpui hun tur sawn hla

All-in-one communication app hlun, Discord chuan kumin March aṭanga khawvel puma kalpui an tum, kum zat tihchianna tur 'Age Verification' chu sawiselna hrang hrang awm avangin sawn hlat a nih thu an puang. Company chuan kumin kum chawhnu lamah kalpui an tum thu Thawhlehni khan an puang chiang a ni.

User tam zawk chuan Discord hmalak tumna pakhat, puitling an ni tihchian a nih hmaa default-a user zawng zawngte "teen-appropriate experiance"-a dah tumna chu an sawisel nasa hle. Hengte avang hian company chuan Thawhlehni vek khan user 90% te chuan kum tihchianna hi tih ve kher an mamawh loh thu leh, app safety system chuan puitling an nih tawh leh tawh loh a lo hre thei sa dawn tih an tarlang bawk.

Sawiselna hrang hrang a awm tak hnu hian Discord lam chuan user 10% chauhin verification hi an tih a ngaih tur thu an sawi nawn leh a ni. User-te kum tihchianna tur, facial age verification kalpui tum a nih thu an lo puan tawh chu thlakin, credit card hmanga verify tum a nih zawk thu company chuan an sawi.