Free Fire India-in Booyah Awards sem dawn

Ram chhung hmun hrang hranga first person shooting game lar, Free Fire India chuan "The Booyah Awards 2026" chu kumin hian sem a nih tur thu an puang. Category 18 a awm dawn a, award hi Garena-in an duan niin India exclusive a nih bakah Free Fire esport huanga content creators hrang hrangte chawi larna atana duan a ni bawk.

Kum danga awards sem ṭuma kalpui tawh ṭhin ang bawkin kuminah pawh category ṭhenkhatah in-game voting kalpui a ni leh dawn a, mahse, vote ṭan theih hun tur erawh an la tarlang lo thung. Hei bakah hian awards ceremony buatsaihtu Grena lam hian khawi hmunah nge huaihawt a nih dawn pawh an la sawi lo. A hma chuan Biswa Bangla Mela Prangan, Kolkata-ah huaihawt a lo ni tawh a ni.

Awards sem tur bakah hian India chauha khelh ṭhin 'Free Fire MAX India Cup Spring 2026' chu kalpui chhoh mek zel a ni. Open City Qualifiers chu thla hmasa thla tir lam khan zawh fel tawh niin Group stage pawh March 8 khian a hmawr bawkna neih tum a ni bawk.