MCU-ah duhtawkin Deadpool a pawt thei dawn ta

Marvel studio president Kevin Feige chuan Deadpool 3 chu Marvel Cinematic Universe lamah kan hmu dawn tih a sawi.

Kum 2019-a Disney-in 20th Century Fox a lei hnu kha chuan Marvel fan-te chuan Deadpool hi MCU-ah hmuh an inbeisei reng tawh a, mahse Marvel thuneitu lamin hemi chungchang hi chiang taka sawi an nei mai lo. Mahse tunah erawh Kevin Fiege chuan Deadpool chu MCU lamah kan hmu ve tawh dawn tih a sawi chiang ta.

Collider-in an interview-naah hemi chungchang hi a sawi chhuak a, Deadpool leh Marvel fan-te chuan hei hi an ngaihven nghal hle a, Deadpool 3 chhuah hun tur nghakhlel takin an thlir mek tawh.

Marvel film ho hi chu mi zawng zawng en tlak, naupang tan pawha en chi a ni deuh vek ṭhin. Mahse Deadpool 3 erawh MCU R-Rated film a ni dawn tih Fiege chuan a sawi tlat mai.

"R Rated a ni dawn a scirpt pawh kan buaipui mek a, Ryan chuan script pawh a enfel mek. Kuminah erawh chan ṭan a ni dawn lo. Ryan hi a buai em em a, lemchan thiam hlawhtling tak a ni. Thil tam tak kan puan lawk tawh tihtur kan nei a, mahse bulṭan a ni tur erawh kan phur hle thung. MCU-ah character danglam tak kan hmu dawn a, Ryan hi force of nature a ni a, chumi a nih avang chuan Deadpool character a rawn chang hi a ropui hle a ni," Feige chuan a ti.

Lizzie Molyneux-Loeglin leh Wendy Molyneux-te unau chuan script nghawrh takin an buaipui mek tih leh a hma berah nakkumah bak lemchan erawh an ṭan hman dawn lo tih a sawi.

Zirtawpni hian Disney+-ah WandaVision premier a ni tawh dawn. Loki bakah The Falcon and the Winter Soldier kan hmu hnai a, kumin chhungin Doctor Strange 2, Black Panther 2, leh Captain Marvel 2 an chang ṭan dawn bawk.

Thor 4 leh Spider-Man 3 an chang mek bawk a, Black Widow tlangzarh mai theih turin an peihfel tawh.