BoA-i'n BApal Entertainment din

South Korean singer- songwriter leh actress, BoA chuan kum 25 chhung SM Entertainment hnuaia a awm hnuah, ama pualin agency BApal Entertainment a din. BApal tih hi 'BoA and Friends' tiha sawi a ni bawk a, BoA leh a fan-ten an din ho niin, artist leh fan-ten inbiakpawhna ṭha zawk an neih theihna turin agency hi kalpui tum a ni.

BoA hi SM Entertainment hnuaiah kum 2000 khan a debut a, Korea leh Japan-ah a hming a chher nasa hle a, khawvel puma Kpop huang zauhna lamah a thawhhlawk hle bawk. Kum kalta kumtawp lam khan SM Entertainment nen sawi hona neiin, kum25 hnuah an thawhdunna chu an titawp ta a ni. A social media-a thuchhuah a siamah, SM Entertainment a chhuahsan chu a inchhir loh thu leh, thlawpna a pe chhunzawm zel dawn tih a tarlang. SM Entertainment pawhin BoA chu company tana mi hlu tak a ni tih tarlangin, a hmalam huna hmachhawp a neihte an thlawp zui zel dawn tih an sawi.