Hip Hop Fest 2019 vawiinah

Team Zero1 buatsaih Hip Hop Fest chu vawiin dar 11 aṭanga zan dar 6:30 thleng neih a ni dawn.

Programme ṭan hma, dar 9:45 aṭanga dar 10:45 thleng free dance class an buatsaih dawn bawk a, heta class petu tur pawh hi mithiam phai lama mi Dancer Samboi an chahchhuak a ni. Hip Hop Fest 2019 hi Dawrpui Multipurpose Centre-ah neih a ni dawn a, Mizorama a vawi khatna turin event khata Hip Hop element chikim phochhuah a ni dawn. Bboying, Djing, Mcing, Graffiti-te a awm vek dawn. Rap Battle pui tak a awm dawn a, Concert session awm dawn bawkin hetah hian Mizo Hip Hop artist-te an inlan ang.

Team Zero1 hian Hip Hop Fest hi India ram pumah pawh ngaihhlut hlawh tak a nih theihna turin theihtawpin hma an la a, element hrang hrangah hian lawmman ṭha tak tak an buatsaih dawn a ni. Rap battle chungchang a hmaa tarlan tawh ang khan boruak a sang dawn tih a chiang. Chumai a la ni lo, Delhi aṭanga chah chhuah DJ thiam tak a inlan dawn. 

Event khar nan hian Rap Concert pui tak buatsaih a ni dawn. Old School leh New School rapper-te an che dawn a, helama tui tan chuan hmaih chi a ni lo ang. G'Nie a inlan dawn a, Murphy leh Rinhlui Pialtu-te'n an hla hit 'Duhlai' an sa dawn bawk. Dirty Jeez leh JonMizo an perform dawn a, tunhnaia rawn comebakc Rdi Ladylicious pawhin a hla thar BOLD V-2 a sa dawn a, Dr. Reuben-a a rawn 'dingchhuak' dawn bawk. New School rapper ṭha tak Sickid a inlan dawn bawk a ni.