Bon Jovi music biopic siam a ni ve leh dawn

Khawvela rimawi huanga thawm nei lian tak takte chanchin leh hun hman dante film a siam a ni zel a, American legendary rock band Bon Jovi chanchin tarlanna biopic chu film studio Universal hnuaiah production kalpui a ni ve leh dawn ta. Rock band biopic siam hi production company hrang hrangin an inchuh luih luih karah Universal Studio lam hian an produce thei dawn ta a ni.

Biopic siam tur chungchang hi tihchian ni tawh mah se, director leh band member lem chang tur erawh tih fel a la ni lo thung a; screenplay erawh Cody Brotter ziah a ni dawn a, eng lam hawi nge a nih dawn tihchian a la ni lo. Box office lamah biopic te an che ṭha thei hle a, hei vang hian Bon Jovi biopic pawh hi a hit hle rin a ni. "Bohemian Rhapsody', 'Elvis', 'Bob Marley: One Love' pawh an lo hit tawh hle a ni. Universal Studio hian April thlaa tihchhuah tur Michael Jackson biopic pawh an lo buaipui tawh a ni.