Hontrade International Ṭhazual Fakna No. 1-ah Sanga Renthlei ft Hlimhlimi 'Ni ropuiah chuan'
Hontrade International Ṭhazual Fakna chart-ah Sanga Renthlei ft Hlimhlimi 'Ni ropuiah chuan' chu pakhatna a ni a, Ruatpuii 'Ka lawm e Lalpa' chu pahnihna niin R. Lalruatsangi 'Chanchintha hril' chu pathumna a ni bawk.
'Ni ropuiah chuan'
Sanga Renthlei leh Hlimhlimi sak 'Ni ropuiah chuan' hi September thlaa an tihchhuah kha niin, Casting Crowns hla 'Glorious Days' Mizo ṭawnga lehlin a ni. Vanlalchhunga Chhakchhuak lehlin a ni a, Kings & Prophets-ah recording hi an ti a; video hi Chiangtea Videography kutchhuak a ni thung.
He hla hi a nalh hle a, a sap hla phei hi chu khawthlang lama Pathian fakna hla lar ber zinga mi a ni a, pakhatna dinhmun a luah thei pawh hi a awm hle a ni.
'Ka lawm e Lalpa' leh 'Chanchintha hril'
Chart hmasaa pathumna Ruatpuii 'Ka lawm e Lalpa' pawhin hma sawn zelin pahnihnaah a rawn inhlangkai ta a, ani pawh hian chart-a a lan tirh aṭangin hma a sawn zel a, a dinhmun a sawh nghet chho mek zel. R. Lalruatsangi 'Chanchintha hril' pawh pangana aṭangin pathumnaah a rawn invawrh ve bawk.
Mizo Idol Grace Lalchhanhimi 'A kiangah' chu palina niin, chart hmasaa pakhatna Lalthlengliani 'Jehova Elohim' chu pangana a ni thung.