T Zorampela a thi
Mizo hla phuah thiam leh sulhnu nei ṭha tak T Zorampela chu kum 70 mi nimin zing dar 7-ah khan a chenna in, Chanmari West-ah a thi. Nimin chhun dar 1-ah khan vui nghal a ni.
T Zorampela hi August 22, 1950 khan a piang a, pianpui unau paruk neiin, an unauah a upa ber dawttu a ni. Kum 1975 khan Lalzidingi nen inneiin fa pali an nei. 1971 khan Mandalay-a an awm laiin a zirlaipui dangte nen Ainawn Band an din a, October 19, 1971-a an hla record phei chu hriat theih china Mizo hla album puitling record hmasa ber a ni hial. He album-ah hian T Zorampela hla phuah 12 lai dah a ni bawk. 1975 khan a ṭhiante nen Zodi Band din lehin, hetah hian lead guitarist a ni a, a hunlai na na na chuan Mizo band hriat hlawh ber pawh a ni.
Hla hi 67 vel zet a phuah a, 'poem' eng emaw zat a phuah bawk.
Music zirna bu leh Mizo
ṭawng zirna bute pawh a siam bawk a, 1974 aṭang khan All India Radio (AIR)-ah artist niin, a thihni thleng hian B+ artist a ni nghe nghe. 'Aw Nang, Kan Lal Kan Pathian' tih hla rimawia a tum phei chu Mizoram Assembly House signature tune-ah hman a la ni reng bawk. T Zorampela hi MZI President leh Vice-President-te pawh lo ni tawh ṭhin a ni bawk.
A hla phuah ṭhenkhat leh tunhnaia satute
Remkimi Cherput - Dam takin mangtha
Lalpanliani - Damlai pialral
Mathlenga - Chung khuanu ruat
Pensy B. Lalthangliani - I sim loh chuan
C.Sanga - Panlai nun
C. Sanga - Phengpheleng leh Rose par
Lalnunsanga - Tunge min chang dawn
Vanlalruati - Vulni a tawi
Henry Lalmalsawma - Ka dem lo che
A nat dan tlangpui
1997 aṭang khan zunthlum natna leh thisen sangin a tlakbuak ṭan a, kum bet em em loa nat chhunzawm zelin, kumin October thlaah khan LRM Hospital-ah dahluh a ni a, kar hnih enkawl a nih hnuah in lamah enkawl chhunzawm tura hawpui a ni.
Hma sawn tura beisei a nih laiin December 13 aṭang khan a taksa a chak lo zual a, theihtawpa enkawl a nih hnuin nimin zing dar 7 khan chatuan ram a pan ta a ni.