Red Hot Chili Peppers Josh Klinghoffer a chhuak, John Frusciante a lokir

Red Hot Chili Peppers chuan Pathianni khan thuchhuah siamin kum 10 chhung zet an guitarist lo ni tawh, Josh Klinghoffer chuan an band a chhuahsan dawn tih an sawi. 

Instagram-ah hemi chungchang hi tarlangin RHCP chuan,"Josh hi musician ṭha tak a ni a, kan ngainain kan zah em em a ni. A bula hun kan hmang leh thilpek chhiar sen loh min ṭawmpui hi kan lawm hle a ni," an ti.

Kum 2008-09 chho vel khan RHCP hian kawng hrang hrang an zawh a nih kha. Anthony Kiedis-a'n chhungkaw lam a buaipui a, Bassist Flea lah  University of Southern California-ah music theory class pe in, solo record lam a buaipui chhunzawm bawk. John Frusciante lahin solo lama kal thlangin solo album a buaipui mek bawk nen. Drummer Chad Smith pawh solo project bakah Joe Satriani-te ho zuiin, an zavaiin kawng hrang hrangah an peng ta a ni.

October 2009-ah khan inzawmkhawm leh zai relin, an studio album 10-na tur buaipui turin hma an la ho leh a ni. Thu lungchhiat thlak deuh erawh chu John Frusciante a tel ve ta lo a,  an backup touring guitarist Josh Klinghoffer chuan a puih chhunzawm a ni. Frusciante hian July 2009 khan band hi a lo chhuahsan fel reng tawh a, mahse December 2009 khan heihi an puang chiang chauh. 

January 2010-ah rimawi khawvelah let lehin an concert-naah erawh Josh Klinghoffer hian guitar a perh ta thung a, February thla a lo nih chuan Klinghoffer chu RHCP official member-ah puan a ni zui ta bawk. Klinghoffer hi an band-ah hian a naupang fal hle a, Frusciante nen hian inhre ṭha tak an ni a, Frusciante pawhin amah thlaktu tur hian a duh ber nia sawite pawh an awm.

Kum 10 lai mai RHCP bula a khawsak hnuah leh show tam taka a inlanpui hnuah Pathianni khan RHCP chuan Klinghoffer chhuah tur thu hi an puang ta a, a chhan tak erawh tarlan a ni lo.

John Frusciante hi RHCP guitarist hmasa ber chu ni lo mah se an guitarist ni ngun ber erawh a ni ngei dawn e. Chutih­rualin RHCP-a a let tur hi lawm an tam hle.

1983-a din RHCP guitarist hmasa ber Hillel Slovak, heroine overdose vanga 1988-a a thih hnu khan guitarist lailawkte pawh han nei bawk mah se John Frusciante hi an chhar chhuak ta a ni. Kiedis leh Flea-te ai hi chuan naupang mah se a bandmate-te lung a dum hle a, mahse 1992 khan an lar tak lutuk avang te, Kiedis nen an inkar boruak a ṭhat loh avang te leh ruihhlo lama a tlan nasat avangin an band a chhuahsan a ni. 1998 khan Flea sawmna pawmin RHCP hi a zawm leh a, 2009 khan a chhuahsan leh.

Pathianni khan  RHCP IG-post-a Klinghoffer chhuah tur an puan rual khan, John Frusciante let leh tur hi an puang tel bawk. He rap rock, funk metal band fan-te tan chuan thu lawmawm leh thu lungchhiatthlak inpawlh a ni ngei ang.