In-House Production-in Hindi film siam dawn

In-House Production neitu, film director Drew Pachuau chuan Hindi film siam turin hma a la mek. J&R Production, Mizoram nen thawk dunin Mizo kutchhuak zinga India hmun hrang hrang theatre-a tlangzarh hmasa ber ni thei tur film an buaipui ṭan a ni.

Drew Pachuau chuan film hi pre-production kalpuiin a changtu tur acting/theatre train chhuak mi thar ṭha tak tak an hmuh thu sawiin, production hi May thlaah ṭan tum a ni. Production crew lam pawh Mizoram pawn lam mi deuh vek an ni dawn a, DOP pawh a ṭha thei ang ber rawih tum niin, Drew Pachuau chu director a ni ang. Mi dang zawng chu state pawn lam mi vek niin mi 20 vel rawih an ni dawn a, shooting hi Assam leh hmarchhak bial hmun hrang hrangah neih a ni dawn a, post production chu Mumbai-ah khawih a ni ang.

Film siam tur hi In-House Production kut chhuak Samuel Pachuau ziah 'Rini leh Rina' kha Hindi film atan hian siam nawnin 'YAAD' tih a ni dawn a, tlem siam danglam a ni dawn thung. J&R Production leh Drew Pachuaute hian film budget-ah hian production cost, publicity leh marketing atan Rs vbc 1 thleng an ruahman. Mizoram film atan chuan budget lian tak ni mah se mainstream a luhpui atan chuan a tlem tham hle tih Drew Pachuau chuan a sawi.

Kuminah film hi peihfel hman a, theatre-a tlangzarh tura certification neih ngaite an tlin thei a nih chuan India hmun hrang hrang theatre-ah tihchhuah an tum. Hemi hnuah OTT platform lian lamah pawh phochhuah chhunzawm a, India rama ṭawng lar zual hmangin 'dub' tum a ni bawk.