2016 - Lilzo kum chu! A chawlh hahdam hnuah Sialsuk tlang a lawn dawn!

Dinthar Vengin 'Hruaitea' an tih, kum 2016 kum tira tu hriat hlawh vak lo chu kum a tawp dawn meuh chuan Mizote ngaihven hlawh ber pakhat a ni ta - Lilzo thlipui a tleh a, kum 2016 kum tawp lamah Zoram rimawi khawvelah ro a rel.

Lilzo hian kum khat kal taa YouTube lama a video dah Duati tih chu heti taka a 'hit' a ring phak bik lo a, kum a liam meuh chuan thlirtu 316,286 zet an awm. Hei mai hi a ni lo, he video ang deuh, a live performance leh a dangte a awm nual a, hengte hian en a hlawh em em vek a ni.

A video dang 'Ka Natna i Chhawk' tih chu thla ruk chhung lekin mi 115,128 in YouTube lamah an en der mai. Hei mai hi a la ni lo cheu - Lilzo thlipui a tleh hnua a video siam thar 'Ka sawm che' tih chu thla hnih chhungin mi 245,174 in YouTube lamah an thlir hman. Hei hi tuin emaw ngaihven tura a nawr luih vang a ni lo a, Lilzo thlipui a tleh a ni mai - a thuchham leh zai en turin Mizote kan inthurual thar ṭhup a ni mai.

Lilzo hian sawmtu a ngah takzet a, management ṭha tak hnuaiah a programme tur hi an siam zel a, hlawh ṭha tak taka concert tura sawmna tam tak a hnar. Nizan khan Serchhip lamah a concert a, zanin hian Krismas hmaa a hun hnuhnung atan Lunglei lamah a che leh ang. A chhungte ruahmanpui angin a pi leh pu bulah thingtlangah Krismas a hmang dawn a, a chawl hahdam pah ang.

Lilzo hi a chawl hlen dawn lo - December 29-ah Sialsuk Tlanga Mizoram Music Festival-ah a inlar dawn. Darkar khat vel zet Lilzo hi a che dawn a, hun rei tak Krismas hmanga a thang boa a hahchawlh hnuah a programme hmasa ber a ni dawn a, boruak thar nen tha tho zawkin Sialsukah Lilzo a che dawn.

Rimawi Kutpui lam

He rimawi kutpui hi chhungkuaa kalna tlak tura duan a ni a, Mizoram hmun tin aṭanga pan khawm theih tur hmun laili tak thlan a ni a, Aizawl leh Lunglei inkara khuate tana ban phak turah nghah a ni.

Mizo rimawi khawvela langsar ber ber an inlar dawn a, tun hma deuh aṭanga kan duhte leh tun hnaia l‚r tharte an tel kim hle ang. Chhun leh zanah hun hman a ni dawn a, en man a awm lo ang - rui buai leh mi dang tana hnawksaka awm erawh a rem dawn lo a, Sialsuk khaw≠tlang an duty dawn. Hun nuam leh hlimawm tak hmang tura Sialsuk Tlang pan turin Sialsuk khawtlangin mi zawng zawng an sawm a ni.