Miss Mizoram 2017 Telna tur form an la chhuak ṭan

Miss Mizoram nakkum January-a thlan turah form la chhuak an awm ṭan. Miss Mizoram 2017-ah hian pakhatnain Rs. 110,000 a dawng ang a, chu bakah chuan Bangkok zinna tur pek a ni bawk ang.

Miss Mizoram hi Mizoram Journalist Association ta a ni a, hun eng emaw chen Lelte Weekly-in a buatsaih hnuah kum 2017 hian Zonet Cable TV Pvt. Ltd. chuan an buatsaih ve thung dawn a ni. Miss India Organisation lamte nena inthlunzawm dan tur ngaihtuah mek a ni a, hei hi tihhlawhtlin a nih chuan Miss Mizoram hi India huap miss thlana Mizoram aiawhtu tur a ni ang.

Tel tur hian kum 18 aṭanga 26 inkar, ft. 5 leh inchi 5 aia hniam lo, Mizorama cheng nih a ngai. Form hi lak chhuah theih zel a ni a, Zonet Office, Aizawl; CCN, Champhai; JB Cable Network, Lunglei, CZS Cable, Kolasib leh Miss Mizoram Facebook Group aṭangten a lak chhuah theih. Aizawl, Lunglei, Champhai leh Kolasib-ah te audition neih a ni dawn a, audition hi January 7, 2017-ah neih a ni ang.