Super Junior Choi Siwon-a’n missionary-a kal a châk
K-Pop boy group hlawhtling, Super Junior hi an music avanga hriat lar an ni a, an concert-naah reng reng mi an tam em em zel. An concert-ah hian an zai ringawt lo a, ṭhalaite Pathian thu lamah kaihhruaina an sawi fo. A mak lem lo, South Korea-ah hian Kristianna a ṭhang chak a, an zaithiam tam tak pawh hi Kristian an ni. Super Junior-a Choi Siwon phei chu Kristian ṭha tak a ni.
Choi Siwon hi CNN-in an kawm a, hetah hian, “Nakinah chuan missionary-a la kal ve hi ka duh dawn a ni. A bikin kan music leh zaite ngaina ramah kal a, an hnena Krista hmangaihna thu nena kal hi ka duh ang,” a ti. Choi Siwon hian twitter-ah pawh Bible châng a tweet nasa thei hle a, chu bakah ṭawngṭaina thute pawh a dah chhuak ṭhin. Chanchinbu pakhatin a kawmnaah Isua chu a ngaihsan ber a nih thu a sawi a, Bible hi a tan chuan vanneihna leh a lehkhabu chuam a nih thu a sawi. Khawi hmunah pawh zin se, Bible keng loin a chhuak ngai lo.
Kum 2007-a an band an chetsual ṭum khan Kyuhyun leh an member dang pathumte an inhliam na hle. Kyuhyun hian a hliam a dam fel hnuah Pathianin a tihdam avanga a lawmzia a sawi châmchi a, “Zai hmang hian Pathian ropuina nasa lehzuala puan chhuah ka duh a, chumi tur chuan nasa lehzualin ka bei a ni,” a ti a nih kha.
South Korea-ah hian Kristian an pung chak hle a, kum 1900 kha chuan he rama awm zaa pakhat chauh Kristian an ni a, tunah chuan mi 10 zela pathum chu Kristian an ni tawh. Khawvela kohhran mala lian ber pawh South Korea-ah hian a awm a, chu chu Yoido Full Gospel Church a ni.