Lehkhabu bawm: 'Dil Loh Malsawmna' lehkhabu tlangzarh

Brian Lalnunhlima, Bungkawn lehkhabu ziah, 'Dil Loh Malsawmna' chu nimin chawhnu dar 2 khan Art & Culture minister C. Lalsawivunga chuan a Office Chamber, MINECO-ah a tlangzarh.

C. Lalsawivunga chuan lehkhabu chhiar leh hlut kawngah Mizote kan tlahniam chu a vei thu sawiin, ziak mite chu hnam rohlu an ni tiin kan chawimawi thiam an ngai tih a sawi. "Social media kan khawih nasat avangin Mizoten lehkhabu hlut nachang kan hre ta mang lo hi a pawi hle a, a bikin thalaiten lehkhabu chhiar kan intihhmuh thar a ngai," a ti. Lehkhabu ziaktute pawhin mipuite hlut tham leh chhiar tlak an chhawp chhuah a pawimawh tih a sawi bawk.

'Dil Loh Malsawmna' lehkhabuah hian thu hlawm (content) hrang hrang 20 awmin bu khat Rs. 200/- man a ni.