Metallica Red Cross Campaign-ah thisen petu an ṭhahnem

American heavy metal band, Metallica leh American Red Cross-in kum kalta April thlaa thawhdunna an siam, All Within My Hands Foundation hnuaiah United States bikah thisen petu mi 25,000 an awm tling tawh. Hei bakah an band in M72 world tour an neih denchhena ram pawn lama blood donation campaign an neihah, khawvel puma an fan-te aṭangin thisen petu mi 40,000 an awm tawh bawk.

All Within My Hands foundation-in a thil tum ber chu natna khirh tuarte ṭanpui leh, hemi kawnga hma la tura an fan-te leh an ṭhiante fuih a ni tih Metallica member Lars Ulrich chuan sawiin, nun chhanhimna atana thisen pek pawimawh zia hriain campaign hi kalpui an nih thu a sawi bawk. U.S.-a M72 tour an neiha thisen pek runpui an neih zawhah, campaign hi rampumah huang zauh a ni. Thisen petute zinga 16% chu thisen vawi khat an pekna niin, a chanve dawn chu kum 16-24 inkar an ni.