BTS-in album thar tlangzarh

Global superstar group BTS chuan kum thum leh thla kaw hnuah an full-length album pangana, 'Arirang' chu nimin Zirtawpni, an ram huna chawhnu dar 1 khan an tlangzarh a, album-a an hla 'Swim' music video an tichhuak nghal bawk. Music video-ah hian Hollywood actress Lili Reinhart a inlan a ni. 'Swim' hi English hla a ni.

BTS album tharah hian hla 14 a awm a, an album hming hi Korean folk song behchhana an phuah niin, band member-te nihna leh an chawrchhuahna pholang thei tura an duan a ni. BTS hian Seoul-a Gwanghwamun Square-ah zanin hian open-air comeback concert an nei dawn a, Netflix-ah stream a ni ang. An concert hi a hmunah mi 260,000 velin an chhim tura chhut a ni a, ram dang aṭang pawhin an fan tam takin Seoul hi an pan a ni. Venhimna lam pawh uluk an tum hle. An band hian documentary, 'BTS: The Return' chu March 27 hian an tlangzarh dawn a, an live concert film, BTS World Tour 'ARIRANG' tih chu kumin April hian theatre-a tlangzarh tura ruahman a ni bawk.