CAA dodaltu Sushant Singh Savdhaan India aṭangin an bân

Mizote hmelhriat hlawh tak mai Sushant Singh chu Citizenship Amendment Act (CAA) dodalnaa a inlan avangin Savdhaan India- India Fights Back host aṭangin an ban!

Delhi-a Jamia Millia Islamia University zirlaite CAA duh loh vanga pungkhawm chunga police chet dan demin, Thawhṭanni khan ram chhung hmun hrang hranga university zirlaiten CAA duh lohna leh Jamia Millia Islamia University zirlaite chunga thil thleng duh lohna an lantir a, Mumbai-a duh lohna lantirtu zingah Savdhaan India- India Fights Back host Sushant Singh pawh hmuh a ni.

CAA duh lohna lantirtu zinga a tel ve avang hian Sushant Singh chuan Savdhaan India aṭanga an ban thu a twitter-ah a sawi. Amah ṭantute'n, "Thudik i sawi man i pek a ngai a ni maw?" tiin social media lamah an chhan a; Sushant Singh chuan hei hi chhangin, "A man ka pek hi thil tê tham tak a ni e," a ti a; "A nih loh chuan Bhagat Singh, Sukhdev leh Rajguru-te engtin nge i hma­chhawn ang?" tiin a sawi belh. 

2002-a tihchhuah The Legend of Bhagat Singh-ah khan zalenna sualtu Sukhdev Thapar lemah a chang a, he film-ah hian Ajay Devgan chu Bhagat Singh lemah changin D Santosh chu  Raj­guru lemah a chang bawk a ni. 

Sushant hian CAA a duh lohna hi au­chhuahpuiin, Jamia Millia Islamia University zirlaite chunga thil thleng chu a dem thu a sawi bawk.

Film eng emaw zatah chang tawhin, Mizo-ten kan hriat larna ber Savdhaan India-ah hian 2012 aṭang khan a chang ṭan a, CAA dodaltu zingah a tel avang hian ban a ni ta a ni. Savdhaan India – India Fights Back hi July 2012 aṭang khan tihchhuah ṭan a ni a, Life-Ok-ah pek chhuah ṭhin niin tunah hian STAR Bharat-ah tihchhuah ṭhin a ni bawk. India rama television series kalpui rei tawh ber zinga mi a ni a, Sushant Singh ban a nih chungchangah hian thuchhuah an la siam lo thung.