CAA dotu Feli Fanai a ṭawng chhuak "Ka ram leh hnam ka hmangaih vanga pen chhuak ka ni"

Citizenship Amendment Act duh loh lantirnaa kal, zai thiam Feli Fanai chu sorkar programme-a sawm tawh lo tura rawtna a awm a, hemi chungchangah hian Feli chuan, "Kan ram tana ṭha lo chu phak ang tawkin ka do ve zel dawn," tiin social media lamah thuchhuah a siam.

December 16-a Vanapa Hall kawta CAA duh lotu Mizo ṭhalai rual kal khawm zingah hian mi lâr ṭhahnem tak an tel a, chu'ng zinga langsar ber pakhat chu zai thiam Feli Fanai hi a ni. He mi hnu hian social media lamah Feli Fanai  chanchin an sawi zui nasa a; an sawina pakhat chu a darh chiam a, chutah chuan, "Feli Fanai hi sorkar prog-ah a tel tawh tur a ni lo. Vawiinah pawh he ti khawp hian min do a nia. Minister tu mahin programme-ah telh tawh loh ni se," tih a inziak.

Hei hi chhângin Feli chuan, "Kei mihring a zawnga chhui chian dawl lo ber hian ka phak ang tawk in kan hnam kan ram hi ka hmangaih ve a. kan ram tana him lo ni a ka hriat CAA 2019 ka do ve na ah ka ei zawnna thleng a nghawng nei thei tur ang leh mi fuihpawrh mai mai vanga kal ve leh do ve ah te min puh hial a, he thil ah hian ka ram leh hnam ka hmangaih vanga pen chhuak ve ka nihna hi ka sawi chhuak lo thei lo. Zai mi eng party mah awn lo leh ruihchilh ve lo ka ni tih pawh hi ka sawi tel duh. CAA dotu ka nih avanga ka nun min chhui a thatna lai hmu reng reng lo te khan, min chhui  min chhui duh suh u, chhuan tur leh thil tha chhui thlak ka nei lo, mahse hei hi ka sawi duh. He Zoram bak hi ram ka nei lo a, ka phak ang tawk hian kan ram hi ka hmangaih a. Kan ram tana ṭha lo chu ka phak ang tawkin ka do ve zel dawn," tiin a ṭawng chhuak.

Feli Fanai hian Instagram lama he thu a dah hnu hian screenshot-a thawn darh a hlawh hle a, amah ṭantu leh thlawptute'n an thlawpna thu hi a IG story lamah a dah ve leh bawk a, mizo ṭhalai tam takin Feli Fanai chungchanga sorkar programme lama sawm tawh lo tura rawtna awm hi an dem a, feli fanai an ṭan thu leh, CAA an dodal thu social media-ah nimin lam khan an tidarh nasa hle.