Chetan Bhagat-a'n CAA chungchangah Modi sorkar a bei

India rama lehkhabu ziaktu lar berte zinga mi leh ṭhalaite zinga tlana tak Chetan Bhagat chuan Thawhṭanni khan twitter-ah CAA chungchangah Modi sorkar a bei nasa hle.

Chetan Bhagat hi BJP thlawptu nia hriat ṭhin a nih avangin a twitter post hian sawizui a hlawh hle a, Twitterati-te pawh a tiphur hle a ni. Economy chhiat chung­changah te, hna tlem chungchangah te, Internet tihtawp chungchangahte leh library-a police tirh luh chungchangahte sorkar chu a dem thu tarlangin, "Ṭhalaite hian dawhtheihna an nei a ni mai thei, mahse an dawhthei chin fiah suh," tiin a ziak.

A tweet hian retweet a hlawh hle nghe nghe. A hma lama a tweet aṭang chuan CAA a thlawp nia ngaitu an tam hle a, mahse Thawhṭannia a tweet erawh hi chu a dan a dang hle. "Politics-a ka ngaihdan chungchangah mi tam tak an buai hle. Ka sawichian duh chu, inlungrual taka mi an chenna leh economy ṭhanna India-ah chiah kan rilru ka pe. Chu chu ka duhthusam pawh a ni. Lehlam chauh thlir ṭhinte hi an khamawm. In lamah ka ṭang lo. India lamah ka ṭang. Chu chu ka inchhuanna a ni," tiih a sawi bawk.