Paul McCartney-a'n album tlangzarh dawn

English musician leh The Beatles member, kum 83 mi ni tawh Paul McCartney chuan album thar buaipui mekin, Ningani zing khan he album aṭang hian a single thar 'Days We Left Behind' a tlangzarh. A album thar tur 'The Boys of Dungeon Lane' tih hi Andrew Watt produce niin, kumin May 29-a tlangzarh tura ruahman a ni.

McCartney hian kum 2020-a ama produce, 'McCartney III' tih a tlangzarh aṭanga kum ruk hnua album a tlangzarh lehna hmasa ber tur a ni. Album trailer pawh tihchhuah tawh niin, single 'Days We Left Behind' hi BBC Radio Merseyside-ah tihchhuah a ni a, he hla chungchang a sawina video clip pawh dah tel a ni. Single leh album thar tihchhuah tur hi McCartney-a'n Hollywood-a Fonda Theatre-a zan hnih show a neih hmaa puan a ni. Kum kalta November thla khan arena tour a lo nei zo tawh a, kuminah tour a neih dawn leh dawn loh puan a la ni lo.