'Mosul'-a changtute ISIS-in an vau?

Netflix film 'Mosul' kha i lo en ve tawh em? Kum 2019-a an tlangzarh kha niin Avengers lama sulhnu ṭha tak lo hnutchhiah tawhtu Anthony Russo leh Joe Russo-te pawh he project-ah hian an tel nghe nghe a, Europe leh Middle East lamah phei chuan Netflix film en hlawh ber zinga mi a ni hial. 

He film hi kum 2016-a Mosul khuaa indona thleng, Iraqi SWAT police squad-te'n ISIS firfiak pawl an ram kawtthler aṭanga nuaibo tura beihpui an thlakna behchhana film siam a ni a, a hit hle. Mipuiin hlut an hlawh bawk a, ISIS lam mit a kham deuh niin a lang a, he film-a changtu ṭhenkhat chuan an social media page lamah ISIS member ni anga insawi te'na an vauna an dawng nual a, thaha vauna hialte an tawng.

SWAT team leader Colonel Jasem lema chang Suhail Dabbach chuan social media lama an film tihchhuah tur chungchang a tarlan hmasak ber ṭumin ISIS lam aṭangin chhan letna a dawng nghal tih a sawi a, video ṭha lo tak tak leh thu ṭha lo tak taka chhan letna a dawn bakah amah an hre tawh bawk a, a fimkhur hle a ngai tawh dawn tih thlenga vauna a dawn thu a sawi.

"Nitinin ilu kha a la awm ngei a ni tih i hriat theihna atan khawih fo ang che. I chenna hmun kan hria a, kan rawn tlawhpawh ang che," tia vauna a dawn thu thlengin a sawi. Amah mai ni lo, a chhungte pawhin hetianga vauna hi an tawng bawk.

A chanpui Adam Besa, police lema chang pawhin WhatsApp lamah vauna a tawk tih a sawi a, a vauna dawnna chu an chhuizui hnuah Turkey-ah an chhui lut tih a sawi a ni. Film financier AGBO, Netflix leh 101 Studios-te chuan he thil thleng hi an la thutak hle tih an tarlang nghal a, an film-a changte an him theihna turin security force lam pawh inrawlh turin an ngen nghel a ni.

Joe Russo chuan mimal nun zalenna tihchhiat hi thil nuam a nih ngai loh thu leh tunge a ni tih pawh an hriat loh aṭanga vauna an film-a changte'n an dawng chu a rapthlak hle tih a sawi a, Netflix leh anmahni security team-ten an chinfel a beisei thu a sawi a ni.

Director leh script ziahpuitu ni bawk Matthew Michael Carnahan chuan an film siam chu entu an tam avangin vauna a awm phah hial tih sawiin, Iraqi ṭawnga an chan avang leh subtitle chiang taka an dah vang nia a lang thu a sawi ve bawk.

Anthony Russo chuan invauna awm chu an la thutak hle tih a sawi rualin ISIS member tak takte'n an vau reng em tih an nemngheh tawh leh tawh loh erawh a sawi lo a ni. Mosul hi Netflix-a tlangzarh a nih hma khan  Venice Film Festival 2019-ah khan premiere a ni tawh a, nikum November 26 khan Netflix chuan a duh apiang en theih turin a chhawp chhuak chauh thung. 

Luke Mogelson article "The Desperate Battle to Destroy ISIS' in a 'inspire' em avanga he film hi siam an ni a, Marrakesh, Morocco-ah film hi shoot-in film shooting lai pawhin a film hming an sawi lang duh lo a ni.