Los Angeles-ah studio liante'n production an ṭan leh tawh

County Health Department hnen aṭanga ngenna an hmuh avangin Hollywood studio liante chu hun eng emaw chen an chawlh ṭhuap hnuah tunah chuan an camera-te nen an thawk chhuak leh ṭan tawh.

Covid-19 hripui lengin ziaawm lam pan lo mah se an lemchan studio lam chu Los Angeles-ah an inher nung leh ṭan nasa tawh hle niin The Hollywood Reporter chuan an tarlang a, heti chung hian LA-ah hian minute tinin mi 10 talin Covid-19 an positive ziah anga chhut a la ni thung tih an tarlang tel bawk.

Los Angeles County Department of Health leh pawl hrang hrang chuan film siamtute chu film production nei rih lo turin an ngen a, hemi a nih avang hian Disney, Warner Bros. Universal, CBS leh Netflix-te chuan an chawlh hman zawh vela lemchan an ṭan leh turte chu tun thla laihawl vel aṭanga ṭan chauh turin an sawn khawtlai hlawm a, hriin ziaawm lam la pan lo mah se tunah hian studio tam tak chuan an khawlte an tinung leh ṭan tawh a ni.

Production an ṭan leh tawh zingah hian  CBS 'All Rise', Showtime 'Shameless'  leh Netflix 'You'-te pawh atel niin The Hollywood Reporter chuan a tarlang a, CBS series NCIS, NCIS: Los Angeles, Why Women Kill, SEAL Team leh Diary of a Future President-te pawh an chang chhunzawm leh tawh.