Google-in thil sawi ziaka chantir thei app tichhuak

Khawvel huapa a multinational company hlun ber pawl, Google chuan sawi lawk awm loin Thawhṭanni khan thusawite ziaka lo dah zung zung thei tur “Google AI Edge Eloquent” app chu iOS tana hman theih tur a tichhuak. App dang ang lo takin offline a khawih theih tura duan a ni a, thusawi laia chiang lo awm ṭhinte pawh a lo tifiah nghal zel thei dawn a ni.

He app-ah hian Google chuan Gemma base ASR (Automatic Speech Recognition) model an hmang a, hemi hmang hian kan ṭawng ruala a lo in-type nghal bakah, mi tam takin kan hman fo kan ṭawng laklawh laia "um", leh "ah" tihte chu thian faiin, thu chhia leh thumal fiah lo awm loin a rawn siam chhuak thei dawn bawk

Lehkhabu ziaktu, journalist, leh office hna thawk ṭhalaite tan kut ngeia type kher ngai loa rilrua awm sawi chhuah lo inziak nghal zung zung hian hna thawh a ti awlsam dawn hle a ni. Eloquent hian kan thumal sawi mai ni loin, kan ‘sawi tum’ zawk kha a lo hrethiam thei a ni.

iOS (Apple) user-te tan chauh la chhuak rih mah se, nakin lawkah Android-ah pawh ‘default keyboard’ anga hman theih turin Google hian ruahmanna a siam mek bawk. AI hian hma a sawn zel a, ṭhalaite tan pawh hmanraw ṭangkai leh hna thawh tiawlsamtu pakhat a nih leh ngei a rinawm.