Zaninah sawi hlawh 'Nula Senior' en theih dawn ta

Kumina film tihchhuah tur zinga sawi hlawh tak mai, Danny Vanchhawng ziah leh direct "Nula Senior" tih chu zanin hian Vanapa Hall-ah Er. Lalrothanga, Secretary Govt of Mizoram, Irrigation Department & Fisheries Department chuan a tlangzarh dawn ta. Tlangzarh zanah hian Mizo streaming platform hlun Lersia Play aṭangin a en theih nghal dawn bawk.

'Nula Senior' film hi promo video tihchhuahin sawi a hlawh a, mipui ngaihven pawh a hlawh phah hle a ni. Promo video aṭanga hmuh theih naupang leh zirtirtu inlaichinna lam tarlan chuan naupang zawk a kaihruai khaw lo thei dawn anga sawi zui a ni, film siamtu lam chuan dan kalh zawng engmah a awm loh thu thuchhuah an siam phah hial a ni. A film hi nula pathum inkawmngeih tak ten harsatna kawng hrang hrang vanga an nuna harsatna tam tak an paltlang dan chanchin a ni.

Director Danny Vanchhawng niin, script writer a ni bawk a, BS Pictures chu DoP a ni. He film hi Mizoram State Legal Services Authority leh Ather, Zothan Autoworks ten sponsor-in Co-sponsor hi Lersia Play a ni. Film OST, Bzi Tochhawng leh Zothana te sak 'Sulhnu' chu tihchhuah a ni tawh a, Mizo Idol 2025 Immanuel Lalremruata sak, 'Lung ka vai leh ṭhin' chu tihchhuah leh thuai an tum.