Women's Polytechnic, Aizawl-in Project Display nei

Women's Polytechnic, Aizawl a Garment Technology Department, Class of 2026 te chuan nimin khan Project Display neiin Chief Guest, Dr. Lalṭanpuia, Director, Higher and Technical Department in a hmanpui.

Garment Technology Department te hian final semester apiangin project pahnih - Project Display leh Garment Production te an nei ṭhin. First semester aṭanga an lo zir tawh zawng zawngte pho chhuahna hun niin, an project aṭang hian mark pek ṭhin an ni. Show-a model ho sam leh hmai hi Beauty and Cosmetology Department a 4th semester leh 6th semester zirlaiten an chei a ni.

Women's Polytechnic, Aizawl hi Higher and Technical Education hnuaia hmeichhe hlang zirna in awmchhun niin department pali(4) - Modern Office Practice, Electronics & Telecommunication Engineering, Garment Technology leh Beauty Culture and Cosmetology department a awm. Zirlai chhuak tur apiangte hi an institution a Placement Cell kaltlangin 90-100% in hna an hmu zel ṭhin. An course te hi All India Council for Technical Education (AICTE) approve vek niin, tunah hian admission an hawng mek a ni.