Lady Gaga leh Doechii hla thar ‘Runway’ tlangzarh

Lady Gaga leh rapper Doechii-te chuan an hla thar 'Runway' an tlangzarh ta. He hla hi tun hnaia chhuak tur film nghahlelhawm tak, ‘The Devil Wears Prada 2’ soundtrack atana duan a ni. Dance-pop upbeat lam niin, Grammy Award pawh lo dawng tawh Bruno Mars bakah Andrew Watt, Cirkut leh D’Mile-te’n an produce a ni.

Film-ah hian Lady Gaga pawh tlem a lang dawn nia sawi thawm a awm. Lady Gaga hi tunah hian ‘Mayhem Ball’ tour neiin a buai hle a, Thawhṭanni hian Madison Square Garden, New York-ah an tour kharna hun a hmang ang. ‘The Devil Wears Prada 2’ hi kum 2006-a chhuak tawh film hlawhtling tak chhunzawmna a ni a, Miranda Priestly (Meryl Streep) leh a junior assistant hlui Emily Charlton (Emily Blunt) te inkar boruak hmuhnawm tak tarlan a ni ang.