Coachella-a mipui au thawm hriat sual avangin Sabrina-in ngaihdam dil

Khawvel huap rimawi kut ngaihhlut hlawh leh lian ber pawl, kar liamta aṭanga neih ṭan Coachella Music Festival, California-a neihah Zirtawpni zana headliner Sabrina Carpenter chuan fan lo lawmtute au thawm a hriat fuh loh avanga a awmdan avangin ngaihdam a dil zui.

Zirtawpni zana a perform laiin Sabrina Carpenter hi mipui lam aṭangin hmeichhe pakhatin hlimna entirna 'Zaghrouta' Middle East leh North Africa vela an uar tak a rawn ti chhuak a. He thil hi Sabrina hian lo hrethiam loin, a piano hma aṭangin, "Ka duh lo, a mak hle mai," tiin a lo chhang let a ni. A ṭawngkam hman dan avang hian social media-ah 'mi hnam nunphung hmusit' anga puhna a hmu zui nghal a ni.

He thil thleng chungchangah hian Sabrina chuan Inrinni khan X kaltlangin thupha chawi nghalin , mipui au chu a hmuh theih loh bakah a hriat chian loh avanga khatiang reaction kha nei a nih thu a tarlang. "Ka thiltih kha a mawi lo hle tih ka hria a, ngaihdam ka dil e. 'Zaghrouta' chu engnge a nih ka hre tawh a, hlimna au hla engpawh ka lawm vek tawh ang," tiin a thil hriat sual avanga pawi a tih thu a hi a tarlang.