Box Office-ah Frozen II nekchhuaktu Jumanji: The Next Level

Box Office-ah kar eng emaw zat Frozen II-in ro a rel hnuah Jumanji: The Next Level chuan a rawn luahlan thei ta a, kar tawpah khan sum a lalut tam ber. Frozen II hi pahnihnaah a la awm tho a, Knives Out chu pathumna a ni bawk.

Frozen II hlawhtlinna hahipin kan tarlang tawh ṭhin a, kumin chhunga film sum lalut hnem ber zinga mi a nihzia pawh kan tarlang fo tawh. US Box Office chart hnuhnung berah erawh Jumanji: The Next Level a ngam ta lo a ni.

Jumanji: The Next Level hi kar tawpah khan theatre 4,227-ah hawn niin, $59,251,543 a lalut a, a sum lakluh hi a sang fal hle.  

Dwayne Johnson, Jack Black, Kevin Hart leh Karen Gillan-te channa Jumanji: The Next Level hi 2017-a tihchhuah  Jumanji: Welcome to the Jungle chhunzawmna kha niin, kum thum liam hnua thil thleng anga chan a ni.

Nick Jonas inlanin boruak a siam a, film siamna atan hian $mtd 125-132 vel an seng a, khawvel puma an sum hmuh tawh zat chu $mtd 212.6 a tling tawh.

Kumin chhunga film chhuaka hlawhtling ber zinga mi Frozen II pawh a sum lakluh a tlahniam ve hret hret mah se, $19,072,948 zet a la lalut tho. Khawvel puma a sum lakluh tawh zat pawh $tld 1.034 a tling tawh a, khawvela film sum lalut tam 38-naah a inhlangkai tawh.

Kumin chhunga film hlawhtling pariatna a ni tawh bawk a, animated film zingah 'highest all-time worldwide opening' dinhmun a luah tawh bawk. Chart hmasaa pahnihna Knives Out chu pathumnaah a tlahniam ve leh bawk a ni.

Jumanji: The Next Level-ah bakah hian Top 5-ah film thar pathum dang lang an awm. Richard Jewell chu palina niin, Black Christmas chu pangana a ni bawk.