LBS Suzuki-in Burgman thar tlangzarh

LBS Suzuki chuan nimin Thawhlehni khan an showroom, Bawngkawnah Burgman Street chhuak thar an tlangzarh. Hei hi April 2 khan India ramah tlangzarh a ni tawh a, ni 12 hnuah LBS Suzuki managing director, Joseph Lalthanpuia leh Loz Hnamte chuan Mizorama hralh chhuah turin an khuh hawng a ni. Tlangzarh inkhawmah hian hauh lawk mi 120 zinga 10 hnenah an pe chhuak nghal bawk.

Burgman Street hi chi hnih - tihnun nan chabi hman ngai lo leh hman ngai a awm a; a hmel leh pianhmang rawn tidanglamin a hma aiin a pui hmel zawk. A khalh a hahdamin a nghet a, ke thluan theih leh gas phurh theih, seat sei ṭha tak a la ni reng chungin changkang zawka thuam a ni a, seat hnuai hawn ngai kher tawh loin petrol thunna dah a ni. Chabi ngai lo chi hi Rs 1, 47, 995 (on-road price)-in lei chhuah theih a ni a, chabi hman ngai chi Rs 1, 37, 974 man a ni thung.

LBS Suzuki hi Suzuki Motorcycle India hnuaia dealer hrang hrang zinga lian leh hralh hnem ber pawl a ni. Kumin bikah January aṭanga March chhungin Suzuki two-wheeler 2,706 an hralh a, heng zingah hian mipuiin Burgman an lei hnem ber. February khan 1,001 hralh chhuakin thla liam taah a tlahniam hret a, 940 an hralh a ni. March bikah Burgman 401 hralh niin, Access 399 an hralh bawk a ni.