AC/DC hla paliin Platinum song certification a dawng

Rock band chuai thei lo AC/DC chuan kum 1980 khan an studio album pasarihna 'Back in Black' an tlangzarh a, he album-a hlate hian vawiin thleng hian ngaihthlak an la hlawh hle.

'Back in Black' tih hming hriat rualin mi eng emaw zat bengah chuan a riff lar lutuk mai kha a ri nghal ngei ang. He album-a hla pali lai hian tun thlengin sales certification thar pali an la dawng. An album title track 'Back in Black' leh 'You Shook Me All Night Long' chu December 12 khan  Recording Industry Association of America (RIAA) chuan triple platinum certification a pe a, hemi album-a mi tho 'Shoot to Thrill' leh 'Hell's Bells' chuan a ṭumkhatna atan platinum certification an dawng bawk.

RIAA hian hla emaw album emaw maktaduai khat chuang hralh chinah Platinum Award hi a pe ṭhin a ni. AC/DC hian kum thar lamah album thar an tichhuak dawn nia sawi thawm a awm a, fan-te tan chuan thu lawmmawm a ni ngei ang.  Singer Brian Johnson leh drummer Phil Rudd-te chu band-ah hian let lehin album thar an buaipui leh nia sawi thawm a awm a, album thar an tihchhuah turah hian guitarist boral ta Malcolm Young part record ṭhenkhat pawh telh a ni mai thei.