Kanye West France-a 'ban' theih dinhmunah ding

Khawvel hriat hlawh rapper Ye (Kanye West tiha hriat lar) chuan a nungchang leh thil sawi tawh avanga buaina tawk zuiin, France sorkar chuan an rama performance a neih tur khap sak a tum mek niin khawthlang media ten an tarlang. He thuthang hi Ye-an UK-a a neih tur ‘Wireless Festival’ ṭhulh a nih hnu lawka rawn chhuak a ni.

Tarlan danin, France interior minister Laurent Nuñez chuan June 11-a Marseille-a Kanye West-a concert neih tur chu tihtawp tumin hma a la mek a, minister hian Marseille mayor Benoît Payan pawh hemi chungchangah hian a rawn tawh bawk. Payan chuan tun hma pawhin Ye hi an khawpuia an lo lawm loh thu a lo sawi tawh a, "Marseille-ah hian inhuatna leh Nazism thlawptu hi kan lo lawm lo a ni," tiin X kaltlangin a lo tarlang tawh bawk.