Gummibär kum 20 tlin pualin feature film siam dawn

Kum 2006-a "I'm a Gummy Bear" hla hmanga internet khawvel deng chhuaktu, kan hriat lar em em Gummibär chuan kumin hian a kum 20-na a tling ta reng mai. He thil hring lam thei, uṭawk hring hmelpu hi naupang mai ni lo, ṭhalaite pawn an lam pui nasa ṭhin hle a nih kha.

Gummibär kum 20 tlin pual hian Gummybear International leh Toonz Media Group thawk dun chuan, kum 2027-ah Gummibär feature film thar ber tihchhuah an tum thu an puang ta rup mai. He hla hi ṭawng chi hrang 45 chuangah lehlin a ni tawh a, khawvel pumah a thawm a lian hle. Hla phuahtu Christian Schneider chuan he naupang ngainat em em character hi ringtone aṭanga bul ṭan a nih thu a sawi a, tunah chuan music video ringawt ni tawh loin khawvel hmun hrang hrangah toys, lehkhabu, leh lifestyle category thlengin a luah tawh a ni. Gummibär kum 20-na puala film thar lo chhuak tur hi ṭhalaite leh naupangte chuan an phurpui hle a rinawm.