Swiss Soccer Club-in Kayne West concert cancel

Swiss soccer club FC Basel chuan Ye, Kanye West tia hriat ṭhin concert neih tur chu an cancel a, show chu thlawp an tum loh thu an puang. FC Basel aiawhte chuan concert buatsaih tura ngenna chu uluk taka an ngaihtuah hnuah kalpui an tum lo tih an puang a ni.

St. Jakob-Park-a concert leh event hrang hrang buatsaih ṭhintu, FC Basel hi Ye concert sawn hlat emaw cancel emaw tu zingah an tel ve ta a ni. Kar hmasa Zirtawpni khan Poland-a Chorzów-a Slaski Stadium-a Ye concert neih tur chu cancel a lo ni tawh bawk tih stadium director Adam Strzyzewski chuan a sawi. Poland culture minister Marta Cienkoska chuan show chu a dodal tih sawiin, Kanye West chu Judate huatna bakah pawikhawihna leh swastika T-shirt hralh chhuah hmanga hlawkna teltu a ni, a ti. Poland-a concert buatsaih chu pawm theih a ni lo tih a sawi.

Tun thla tir khan Ye hian France-in an rama luh an phal loh hnuah Marseille concert neih hun tur a lo sawnhla tawh bawk a ni. UK sorkar chuan Wireless festival-a a headline tur chu duh loin an rama a luh a phalsak lo a, hei vang hian festival hi cancel a lo ni tawh bawk.