Citizenship Amendment Act duh lo zingah Alia Bhatt leh Kangana Ranaut

Citizenship Amendment Act (CAA) duh lohna lantirtu an pung zel a, Bollywood star zinga mi hriat hlawh ber berte pawhin an dodal zel. Gully Boy star, Bollywood actress zinga huhang ngah ber pawl Alia Bhatt chuan CAA duh lohtu zirlaite a thlawp thu a au­chhuahpui a,  Kangana Ranaut pawhin Bollywood-a a ṭhiante auchhuak duh lo chu a dem thu na takin a sawichhuak ve bawk.

Mohammad Zeeshan Ayyub, Farhan Akhtar, Parineeti Chopra, Richa Chadha, screenwriter Javed Akhtar, filmmakers Reema Kagti, Vishal Bhardwaj leh Anurag Kashyap-te bakah Hollywood actor John Cusack-te pawhin zirlaite chunga police chet dan an dem thu leh CAA an dodal thu an auchhuahpui ve tawh bawk a ni.

Kamal Haasan pawhin Thawhlehni khan Narendra Modi kaihhruai sorkarin CAA a hnukkir hma chuan a chawl dawn lo tih sawiin, Nilaini pawh khan Madras University-a CAA duh lohna lantirtute a  tlawh.

Alia Bhatt hian a instagram-ah India constitution  Preamble thlalak story-ah a hmang a, a dawt chiahah "Zirlaite aṭangin zir rawh u" (learn form the students) tih a dah leh bawk. Alia hian a hma pawhin fiamthu thiam Vir Das’ tweet, CAA pawm a nih hnu lawka economy tlakchhiat thu a tihelna pawh a lo retweet tawh bawk a ni.

Sonakshi Sinha pawhin social meidia- twitter leh facebook-ah Preamble thlalak hi post ve tawh bawkin, chu chu kan nih ṭhin, kan nihna leh kan nih chhunzawm zel tur a nih thu a tarlang tel.

National Film Awards leh Filmfare Awards eng emaw zat la tawhtu  Kangana Ranaut chuan Bollywood-a a ṭhiante, CAA chungchanga ngawih chuh tlatte chu a dem thu sawiin,  Bollywood star ngawih chuh pawlte chu 'pa lo', 'mawl' leh 'mi mumal lo' an nih thu a sawi.

Time of India-in an interview-naah Kangana chuan lemchan thiam ṭawngchhuak duh lote chu zak hle tur an nih thu leh, Bollywood chu mimawl leh mahni chauh inngaihtuah awmkhawmna a nih a rin ngai loh thu a sawi. "An thiltih zawng chu nikhatah vawi 20 darthlalangah an inen a, electricity leh engkim kan nei thei vek a, eng vangin nge ramchhung buaina kan ngahtuah ang, tiin an inngaihtuah a ni," a ti. Mi ṭhenkhat chu a nuam chinah an biru a, mipui chunga lengah an inngai a ni, tiin a lemchan thiampui ngawih chuh tlatte chu a dem thu na takin a sawichhuak a ni.

Cheetan Bhagat-a'n CAA chungchangah a dinna chiang taka a tarlan hnuah leh zirlaite dawhtheihna fiah chi a nih loh thu a tarlan hnuah Arundhati Roy pawhin a duh loh thu a auchhuahpui ve leh. Writer-activist Arundhati Roy chuan CAA chu "1935 Nuremberg Laws of the Third Reich" nen khaikhinin mipui­te chu dingchhuak ngam turin a ngen.

Booker Prize pawh lo dawng tawhtu Arundhati chuan,"Kum thum liam taa pawisa tih thih, kan ram economy tichhetu policy hman sa nih khan dawhthei takin bank kawtah kan intlar tawh. Tunah kan ram constitution tichhe turin National Register of Citizens leh Citizenship Amendment Bill a ruala kalpui a ni leh ta a, kan ngaihdan leh duhdante engahmah an ngai lo a ni," tiin a sawi.

Ani bakah hian Devdutt Pattanaik leh Ramachandra Guha-te pawhin CAA an duh loh thu an auchhuahpui tawh bawk. Ravinder Singh pawhin CAA chu 'anti-India' tiin a lo sawi hial tawh bawk a ni.