Spotify all-time chart-ah Taylor Swift, Bad Bunny leh The Weeknd langsar

Digital music service lian, Spotify-in an 20th anniversary puala a vawi khatna atana all-time most streamed an tihchhuahah Taylor Swift chu artist zinga stream nasat ber a ni. Bad Bunny album, kum 2022-a chhuak 'Un Verano Sin Ti' chu album stream nasat ber niin The Weeknd hla 'Blinding Lights' chu hla stream nasat ber a ni bawk.

Artist chart-ah hian Bad Bunny chu pahnihna niin, Drake, The Weeknd leh Ariana Grande ten an dawt. Top 10-ah Ed Sheeran, Justin Bieber, Billie Eilish, Eminem leh Kayne West-te an lang bawk.

Album chart-ah hian The Weeknd 'Starboy' leh 'After Hours' chu pahnihna leh panganaah an lang. Ed Sheeran album '÷' chu pathumnaah awmin, Olivia Rodrigo album 'Sour' chu palinaah a awm bawk. Drake, Swift, Post Malone leh Bad Bunny-te chuan an album pahnih ṭheuh chart-ah an lanpui. Swift album 'Lover' chu pariatnaah a awm. Song chart-ah Sheeran 'Shape of You', The Neighbourhood 'Sweater Weather', The Weeknd 'Starboy' leh Harry Styles 'As It Was' te chu top 5-ah an awm.