Instagram-in app thar "Instants" enchhin mek

Social media platform lian hrang hrang enkawltu, Meta chuan an hnuaia platform Instagram-a thlalak vawi khat en hnua bo leh nghal 'disappearing photos' inthawn tawnna tur app thar, 'Instants' tih chu ram ṭhenkhatah an test mek tih an puang. iOS leh Android a hman theih tur niin khawvel huapin eng tikah nge an tihchhuah dawn tih erawh hriat a ni rih lo.

App thar hi tun dinhmunah Spain leh Italy rama hman chhin tur chauha kalpui a ni a, Instants app hian BeReal leh Snapchat te kalphung rawn zuiin, thlalak mawi leh hmuhnawm taka edit kher ngai lo, authentic leh real-time-a midangte nena in share zung zung theihna tur a ni. App-ah hian mahni gallery aṭanga thlalak hlui upload phal a ni lo a, app chhung camera ngei hmanga thla lak a, vawi khat en tawh hnua darkar 24 chhunga bo leh nghal tur a ni.

Instants hi app hran anga hman theih a nih rualin, Instagram pangngai chhungah pawh 'in-app feature' angin a hman kawp theih bawk dawn a, mutual follower leh 'Close Friend' list-a mite chauh hmuh theih tura siam a ni thung.