Mark Ronson-a'n Honorary Clio Award dawng dawn

Producer leh songwriter, Mark Ronson chuan kumina Clio Awards Cipriani, New York City-a May 12 a sem turah Honorary Clio Award a dawng dawn. Clio Award hi actor, writer, leh producer ni bawk Keegan-Michael Key chuan a host dawn a ni.

Honorary Clio Award hi kumtin mimal, hna thawk ṭha leh nghawng nei liante hnenah hlan ṭhin a ni. Ronson hi rimawi leh culture huanga a thawh hlawk avangin leh entertainment huanga sulhnu a lo neih tawhte avangin he chawimawina hi hlan a ni dawn a ni.

Mark Ronson hian Grammy Award pawh vawi kua ngawt lo dawng tawhin heng zinga pahnihte hi Amy Winehouse hla 'Rehab' leh 'Uptown Funk' Bruno Mars nen an thawh dunnaa producer leh engineer hna a thawh hmanga record of the year a dawnte an ni. Hei bakah hian rimawi huanga thawm nei lian tak tak Adele, Paul McCartney, Miley Cyrus, leh Dua Lipa te nen pawh an lo thawk ho tawh bawk.