ENC 2026 aṭangin South Korea inhnukdawk

Khawvel esports powerhouse tia hriat lar, South Korea chu kumin November thlaa Riyadh-a neih tur Esports Nations Cup (ENC) 2026 aṭangin an inhnukdawk a, hei hian esports khawvel a ṭhawng hle. Tarlan danin, he thutlukna hi Korean e-Sports Association (KeSPA) leh a buatsaihtu Esports Foundation-te inkarah player thlan dan chungchanga inremlohna a awm avanga thleng a ni.

S. Korea tello chuan he inelna hian awmzia a nei lo hle dawn nia ngai pawh an ṭhahnem hle. League of Legends-ah phei chuan Korea leh China-te hi kum 2012 aṭang khan khawvel champion ni deuh reng thei an ni a, an tel lo chuan 'Khawvel Champion' nihna inchuh chu a thawm a nat loh phah hle dawn niin player tam tak chuan an sawi.

China pawh an tel dawn leh dawn loh a la chian loh avangin, he inelna hi a hlawhtling tawk lo ang tih hlauhthawnna a lian hle. Esports Foundation chuan Korean player-te tel thei hram turin hma lak chhunzawm an tum thu sawi mah se, KeSPA remtihna loa player-te an inlan a nih chuan Korean Olympic Committee lamin hremna an pe thei dawn thung. Hei hian ṭhalai esports ngainatute rilru a tihnual hle a, inelna ropui tak tur kha a 'lumbo' mek a tih theih awm e.