Nakkumah global audition 'GIRLS PLANET 2'

South Korean pay television music channel, Mnet chuan nakkumah global audition series 'GIRLS PLANET 2' buatsaih a ni dawn tih nimin May 1 khan an puang. Network chuan khawvel pum aṭangin a tel turte lak luh ṭan an ni tawh tih an sawi bawk.

'GIRLS PLANET 2' hi 'PLANET' series-a installment thar ber a ni. Kum 2021 khan a hmasa ber atan 'Girls Planet 999' buatsaih niin, he series kaltlang hian Kep1er girl group din a lo ni tawh a ni. Hemi hnuah 'BOYS PLANET' leh 'BOYS II PLANET' buatsaih leh niin, ZEROBASEONE leh ALPHA DRIVE ONE boy band din a ni bawk.

'GIRLS PLANET 2' a tel tumte tan nimin May 1 aṭang khan online hmanga dilna theh luh theih a ni. Mnet chuan khawvel hmun hrang hrangah contestant-te chu in-person audition kalpui an tum bawk a, chung zingah chuan KCON JAPAN 2026 leh KCON LA 2026 pawh a tel.